Nagbutang na sang barriers ang Vallacar Transit Incorporated sa atubang sang ginapondohan sang mga buses antes magsaka ang pasahero matapos ang insidente sa Dumaguete Ceres Terminal sang Hulyo 5.
Madumduman nga tatlo ka mga pasahero nga nagabantay sa terminal ang napilasan matapos nabungguan sang naglapaw nga ceres bus sa Dumaguete Ceres Terminal sa Barangay Calindagan, Dumaguete, Negros Oriental.
Suno kay Jade Seballos, media relations officer sang Vallacar Transit Inc., pagkatapos sang insidente, gilayon sila nga nagbutang sang barriers sa atubang sang ginaparkingan sang mga bus para sa proteksyon sang mga pasahero sa lounge.
Suno sa iya, sadto may yari na sini nga daan apang ginhukas lamang bangud mabudlay para sa mga pasahero ilabi na ang mga may bitbit nga gamit bangud nagakabunggo sa barrier.
Apang pagkatapos sang insidente, ila ini ginbalik para sa proteksyon sang mga pasahero.
Suno diri, nagdugang man sila sang mga guards sa terminal agud masiguro ang kaluwasan sang mga nagabantay.
Ginhukas naman suno sa iya ang perimeter fence kag gin-extend sa atop agud maproteksyunan ang mga pasahero kun nagaulan.
Nagapangayo man ini sang kooperasyon sa mga pumuluyo nga bantayan nila ang ila mga personal nga gamit kun yara sa terminal.
