Ginpasalig sang spokesperson sang Vallacar Transit Incorporated (VTI) nga ginahimo sang pamunuan sang nasambit nga bus company ang tanan nga masarangan agud nga mapabilin ang seguridad sang ila nga mga pasahero.
Sa interview sang Bombo Radyo Bacolod kay Jade Marquez, indi dapat magkabalaka ang mga pasahero nga nagasakay sa ceres bus bangud ginasiguro sang mga pamunuan sang bus company ang seguridad sang mga ini.
Suno kay Marquez, sa pagsulod pa lang sa terminal sang bus, may yara na ang mga security personnel sang ginapatigayon nga frisking sa mga pasahero antes magsaka sa bus.
Suno diri, samtang nagabiyahe, ang driver naman kag ang konduktor ang nagasiguro sang seguridad sang mga pasahero.
Ginpahayag man sini nga mas maayo kun ang mga pasahero ang nakahibalo kun sa diin ang designated nga pick-up areas ukon bus stop magluwas sa bus terminals.
Suno sa spokesperson sang Vallacar Transit Incorporated (VTI), ginasunod sang bus company ang tanan nga mga security measures nga ginapatuman sang Department of Tourism.
Ginpahayag man ni Marquez, nga isolated case ang natabo kag aminado man ini nga makakulugmat ang natabo nga pagtiro-patay sa maglive-in nga mga negosyante samtang nagasakay sa Victory Liner sa Nueva Ecija, kahapon, apang ginasiguro sini nga safe ang mga pasahero nga nagasakay sa ila nga bus units.
