Ginpahanumdom sang presidente sang Association of Barangay Captains sa Negros Occidental nga indi pa mahimo makapangampanya ang nagakandidato para sa palaabuton nga Barangay and Sangguniang Kabataan Election tubtob nga wala pa ang campaign period.
Nahibaluan nga maga-umpisa na ang Election period sa Agosto 20 tubtob Nobyembre 29, samtang kadungan man sini ang implementasyon sang gun ban.
Ang filing sang certificate of candidacy ang nakaschedule naman sa Agosto 28 tubtob Setyembre 2.
Ginapahanumdom ni Valladolid Board Member Juvy Pepello, nga sa tion nga makapasa na sang COC, sumugod Setyembre 3 tubtob Oktobre 18, indi pa mahimo makapangampanya ang mga magapapili.
Bangod sini, likawan anay ang pagpost sang mga flyers kag iban pa nga election materials kasubong man ang pagtambong sa mga event agud ipalayag ang kandidatura.
Ang campaign period ang maga-umpisa sa Oktobre 19 tubtob 28.
Ang adlaw sang eleksyon ang patigayunon sa Oktobre 30 halin alas-7:00 sang aga tubtob alas-3:00 sang hapon.
Suno kay Pepello, sa pagfile pa lamang sang COC, gina-orient na ang mga kandidato nga indi pa mahimo magkampanya antes ang campaign period kaangay sang pagpost sang posters, pamalay-balay kag pagpatigayon sang mga feeding activities kag iban pa.
Dapat man nga mangin vigilante ang mga pumuluyo sa pagbantay sa mga kandidato.
Paathag ni Pepello nga kun wala pa nakafile sang COC, ang mga incumbent officials ang sarang gihapon nga makaguest sa mga graduation rites apang ini ang indi naman nagakaigo sa mga indi incumbent kag wala sa pwesto.
Dugang pa sini nga ang alkalde ang sarang man nga maka-endorso sang suportahan sini nga local officials sa Barangay level.
