Ginreklamo sang mga ginikanan ang gina-alegar pagpatumbaya sa ila isa ka tuig kag duha ka bulan nga bata sa Valladolid District Hospital gani kritikal sa karun ang kondisyon.
Sa Ipa Bombo Ta segment sang Bombo Radyo Bacolod, nagdangop ang mag-asawa nga sanday Girlie Garcia, 29 anyos kag bana sini nga si Teodoro Garcia, mga residente sa Purok Mainuswagon, Barangay Busay, Bago City.
Sa interview sang Bombo Radyo Bacolod kay Girlie, makatatlo na nagpalanuka kag makatatlo naman mag-loose bowel movement (LBM) ang ila bata antes nila gindala sa Valladolid District Hospital kapin alas-9:40 sang gab-i sang Agosto 11.
Nurse lamang ang nag-atubang sa ila, gintandog lang ang tiil sang bata kag wala na gintsekar, kag sa ila na lamang nagpamangkot.
Ginkuhaan man nila stool sample ang bata, apang paggwa sang resulta, ginhambalan sila nga normal lamang ang higko sang bata, kag mahimo ini ang wala lamang natunawan, gani sila ang ginpahanugutan na nga magpauli.
Apang bangod dulom na kag malayo pa ang pulian, nag-ayo ang mag-asawa nga magtinir na lamang sa ospital.
Bangod nagasegi gihapon ang LBM sang bata, liwat sila nagdangop sa doktor kag sila ang ginresitahan lamang sang pedialyte, isa ka oral electrolite solution, kag sila ang ginalabay-labayan na lamang sang mga nurses kag wala ginatsekyar ang pasyente
Ala-1:45 sang kaagahon, natalupangdan sang ginikanan nga nagalapsi na ang bata bangod sa dehydration gani nag-ayo na ini nga madextrose ang bata.
Nagkombulsyon na ang ila bata alas-8:00 sang aga, kag didto na lamang nagdamo ang mga doktor kag nurses nga nag-assist diri.
Dugang pa sini nga wala man ginamonitor ang dextrose sang bata, nga tuman ka gamay ang tubod, nga kuntani nakadepende sa kadamuon sang nadula nga fluids sa lawas sang bata.
Tubtob nga naghambal ang doktor nga indi masarangan sang ospital ang pagbulong sa bata, kag gintugyan nga isaylo sa Riverside Medical Center sa Bacolod City.
Gindul-ong man sang ambulansya ang pasyente, apang sila ang wala ginhatagan sang referral, sa baylo ginpanugyan lamang kay Girlie nga makitluoy ini nga pasudlon ang bata bangod sa kritikal na sini nga kondisyon.
Suno sa iloy, ginsulod sa Intensive Care Unit (ICU) ang iya bata kag gintubuhan, kag sa karun wala sila nakahibalo kun masarangan sang bata ang iya kondisyon.
Sa findings sang doktor, ang bata ang may ara na sang pneumonia, acute gastroenteritis kag iban pa nga komplikasyon lakip na sa utok nga ginalantaw tuga sang severe dehydration.
Sa karun, nagadangat na sa kapin P200,000 ang ila nga bill sa pribado nga ospital.
Nagapati ang mag-asawa nga kun gin-atinder lamang sang timprano sang Valladolid District Hospital ang ila bata, wala na ini nag-antos sa kaangay nga sitwasyon.
