Yara sa karun sa Department of Social Welfare and Development (DSWD) facility sang banwa sang Valladolid ang tatlo ka kabataan nga nailo matapos ginluthang-patay sang pulis ang iya kahagugma kag nag-utas man sang kaugalingon nga kabuhi sa Purok Camia, Barangay Poblacion, Valladolid, Negros Occidental kagab-i.
Ang pulis ang ginkilala nga si Police Master Sgt Larry Junio, 40 anyos, residente sang Barangay Doldol, Valladolid apang assigned sa Iloilo City Police Station 5 sa Mandurriao, Iloilo City samtang ang babayi ang ginkilala nga si Maicah Redil, 33 anyos.
Si Junio ang may legal nga asawa kag bata, samtang si Redil ang may apat naman ka kabataan nga edad 13, 10, 6 sa iban nga lalaki samtang ang agot nga manug duha ka tuig ang bata nila nga duha ni Junio.
Ang subang ang nagbakasyon sa Manila gani tatlo lamang ang kaupod nila sa balay sang matabo ang insidente.
Sa interview sang Bombo Radyo Bacolod kay Valladolid DSWD Head Rona Gepanago, sila ang magapatigayon pa sang assessment kun sa kay sin-o nagakadapat ihatag ang kustodiya sang mga bata.
Apang ginahulat man nga maka-abot ang utod ni Redil nga babayi gikan sa abroad sa Martes, bangod ginalantaw nga ini ang magadesisyon.
Suno kay Gepanago, lantawon man nila kun ano ang sarang mabulig sa pagpadayun sa pag-eskwela sang mga kabataan.
Ginschedule naman sa psychosocial intervention ang 10 anyos nga bata bangon nawitness sini mismo ang pagpangluthang, kag ini ang kaangay nga natrauma.
Nahibaluan nga sang gintiro sang pulis ang iya iloy, gilayon sini ginkuha ang isa ka tuig nga manghod kag pakadto pakari nga nagpangita sang makabulig sa iya bangod ginluthang ang ila iloy.
Ginhambalan na lamang ini nga luwas ang iya iloy, kag didto na amat-amat nag-ayo ang iya kondisyon kag nasaysay kun ano ang iya nasaksihan.
Samtang ang anom ka tuig nga bata ang bag-o lamang na-operahan sa ulo matapos nga maigo sang palpal nga steel kag ini ang naghubag.
Ang DSWD ang padayun man nga nagapakig-angot sa Rural Health Unit.
Panawagan ni Gepanago sa mga Dolidnon nga indi pag-isensationalize ang isyu sa mga kabataan bangod ini ang mabug-at para sa ila.
