Gina-usisa pa sang Valladolid Municipal Police Station sa Municipal Health Office sang banwa ang mga records sang mga nagpaidalum sa prenatal kag mga nagabusong nga due na sa pagbata.
Ini matapos nga masapwan ang isa ka lapsag nga babayi nga wala na sang kabuhi sa Purok Bansa, Barangay Central Tabao, Valladolid Negros Occidental kaina sang aga.
Sa interview sang Bombo Radyo Bacolod kay Police Major Eric Dronila, hepe sa Valladolid Municipal Police Station, nabatun nila ang report alas-7:15 sang aga sang personal nga nagpadulong sa estasyon ang Barangay Kagawad sa Central Tabao.
Nakumpirmar nila sang ginpadulungan ang nagahapaon nga lapsag kag naga-ulon ang ulo sa isa ka goma samtang nagabaruron naman sa liog sini ang iya umbilical cord.
Suno sa hepe, sa ila nga interview sa Municipal Health Office, mahimo nga walo pa lamang ka bulan ang lapsag, apang mahimo naman nga wala na ini sang kabuhi sang ginbun-ag.
Paathag ni Doronila nga ang tikang sa pagtsekyar sang record sang Municipal Health Office ang agud matumod ang mahimo iloy sang lapsag, kun ini ang residente sa Valladolid.
Wala man ginadula sang hepe ang posibilidad nga may-ara sang nagapatigayon sang abortion sa banwa bangod sa nakaligad nga mga binulan, may nasapwan man nga bangkay sang lapsag kag wala na sang ulo sa kilid sang dagat sa kalapit nga Barangay.
Pahanumdom ni Doronila sa mga Dolidnon nga ang intensyonal nga pag-abort sang ginabusong ang isa ka krimen.
