Gindismiss sang Makati City Prosecutor’s Office ang Violence Against Women and Their Children (VAWC) Act nga ginfile batok kay Bacolod City Lone District Congressman Alfredo “Albee” Benitez.
Madumduman nga ang nagfile sang kaso amo si Dominic “Nikki” Lopez Benitez, ang legal nga asawa ni Albee.
Sa interview sang Bombo Radyo Bacolod kay Bacolod City Councilor Atty Caesar Distrito, nga nagapabilin nga spokesperson ni Congressman Albee, gindismiss ang kaso bangod sa kakulangan sang ebidensya nga ginpresentar.
Samtang ginpahayag man ni Distrito nga naghipos lamang si Cong Albee apisar sa mga isyu bangod siya ang may salig kag ginarespeto ang legal nga proseso.
Matapos ma-evaluate ang ebidensya, wala nakita ang nagakaigo nga ebidensya nga makahatag sang bug-at sa akusasyon nga economic abuse kag psychological violence ni Nikki.
Suno sa kongresista, wala nameet sang mga ginplastar nga ebidensya ang legal standards para sa criminal prosecution.
Panindugan ni Albee nga ang pagdismiss sa kaso ang nagapamatuod lamang nga wala sang basihan kag malisyoso ang nasambitan nga akusasyon.
Pangabay naman sini nga tuldukan na ang isyu, kag indi ulamiron ang ila mga kabataan, kag sila ang hatagan sang privacy nga makamove-forward gikan sa kontrobersiya.
