Nagpasalig ang Violence Against Women and Children officer sang Barangay Busay, Bago City nga sila ang magahatag sang Barangay Protection Order sa complainant.
Madumduman nga nagdangat sa Bago City Police Station ang complainant nga si Analiza Matinong kag VAWC officer Gelanie Legaspi matapos liwat nga may nagluntad nga komosyon.
Sa interview sang Bombo Radyo Bacolod kay Legaspi, ginpanginwala sini nga nakapangayo na sa ila sadto sang Barangay Protection Order si Matinong.
Suno diri, anom ka bulan na ang nakaligad sang una nga nagpa-Barangay ang complainant apang agud ireklamo ang iya bana sa pagpangirida.
Natabu-ay naman ang mag-asawa sa Barangay matapos magreklamo ang bana sa VAWC nga nagaka-ulamid na ang ila bata.
Suno kay Legaspi, alegasyon sang amay nga kun maghalin sa balay si Matinong, ginalock sini ang balay gani indi makasulod ang ila nga bata kag nagakagutman.
Dugang pa sini nga parehas sa complainant, ang bana ang may-ara man sang mga lagob sa lawas.
Husayon man kuntani ang mga ini sang nasambitan nga tion apang nagdangat sa komosyon kag didto na nagpahayag ang complainant nga magareklamo na lamang sa Bombo Radyo Bacolod.
Dugang pa sini nga nagademand si Matinong nga pabulagon sila sang iya bana, kag tungaon na lamang ang ila mga pagkabutang, apang gin-athag ni Legaspi nga sila ang wala diber magpabulag sang gin-unite sang Ginoo.
Nagalain man ang buot sini bangod suno sa iya, naulamid na ang tanan nga mga opisyales sang Barangay.
Paathag sini nga wala nila ginadampigan ang bana, kag ang VAWC ang para sa mga kababainhan, apang sadto ang complaint sang bana ang para sa ila nga bata.
Nagcommit ini nga hatagan nila sang Barangay Protection Order si Matinong, apang ini ang magalawig lamang sang 15 ka adlaw.
Kun sa diin indi mahimo magpalapit sa ila ang bana, kag kun ini ang mabayolar, siya ang mahimo mapriso.
Pahayag ni Legaspi nga sarang man nga makapangayo sang Permanent Protection Order si Matinong sa Korte.
Si Matinong ang una na nga nakafile sang Physical Injury nga kaso sa iya bana sa City Prosecutor’s Office, gani ini ang indi na ma-intrahan sang VAWC.
