Napanagtag na ang mga vote counting machines, ballot boxes kag official ballots nga gamiton sa mga kabanwahanan kag kaciudaran sa Negros Occidental sa eleksyon sa Mayo 9.
Sa interview sang Bombo Radyo kay Provincial Election Supervisor Atty. Roberto Salazar, gindistribute ang election paraphernalia sang Abril 26, 28 kag 29.
Sa karon suno kay Salazar, ang mga ballot boxes ang yara sa kustodiya sang city ukon municipal treasurer’s office kag election officers.
Nangin matawhay naman ang deployment bangud sa bulig sang mga pulis kag mga suldado.
Suno kay Salazar, nagahulat pa sang advice ang PES nagikan sa central office kun pila ang contigency machines para sa Negros Occidental.
Kumpleto naman ang official ballots santo sa numero sang registered voters.
Suno kay Salazar, indi mabukad ang box nga ginasudlan sang balota gani naghingyo sila sa central office kun sarang masid-ing ang ballot IDs agud masiguro nga ang balota nga gindeliver ang para gid man sa nasambit nga presinto, apang pending pa ang ini nga request.
Base sa una nga guidelines, indi mabuksan ang box nga ginasudlan sang official ballots apang proactive measure ini sang PES Negros Occidental agud masid-ing ang box sa presensya sang iban nga partner agencies.
Bangud indi ini mahimo sa level sang Office of the Provincial Election Supervisor, nagahulat sa karon sang advice ang opisina ni Salazar kag ginalauman nga mapagwa ang desisyon sa masunod nga inadlaw.
