Patay ang manuglibod sang utan sa Sitio Vergara, Barangay, Bug-ang, banwa sang Toboso matapos ginhatok-hatok labo sang lalaki nga may diperensya sa paminsaron, Martes sang hapon.
Ginkilala ang biktima kay Roberto Peruma, 51-anyos sang Barangay Hinup-ay, Calatrava samtang ang suspetsado naman amo si Argie Pasigna, 24-anyos sang Barangay Bug-ang.
Sa interview sang Bombo Radyo Bacolod kay Police Major Joery Puerto, hepe sang Toboso Municipal Police Station, nakit-an sang suspetsado nga nagalibod sang utan ang biktima sang hinali na lamang sini ginlagas kag ginlabo sang makapila ka beses si Peruma gamit ang binangon.
Maayo lang suno kay Puerto nga gilayon ini nga napunggan sang mga nakakita nga residente bangud tuyo kuntani ni Pasigna nga chop-chopon ang lawas ni Peruma.
Suno sa iloy sang suspetsado, may deperensya ini sa paminsaron kag natiempohan naman nga wala ini nakatumar sang bulong.
Nakahunong na karon sa Toboso PNP si Pasigna kag natalana nga pasakaan sang kaso nga murder ano man nga oras subong nga adlaw.
