Ginklaro sang vendor sa Libertad Public Market nga indi matuod ang naglapta nga video nga nagpamudyot lamang sang mga panakot ang personnel sang Bacolod City Legal Office sa iya baligyaan nga wala nagbayad.
Sa interview sang Bombo Radyo Bacolod kay Allen Vicentilla, tag-iya sang baligyaan, iya nga asawa ang makita sa video sang nagabaligya sang Lunes, samtang kilala man sini kun sin-o ang nagpost online sang video.
Pahayag sang vendor nga abyanay sila sang City Legal personnel kag madugay na nila ini nga suki.
Pasalig niya nga nakabayad ang duha ka personnel, kag gintanyagan pa sini sang reject nila nga lamas sa mas manubo nga presyo.
Nadumduman pa sini nga patatas kag carrots ang ginbakal sang mga personnel bangod sila ang magaluto sang menudo.
Indi mahangpan ni Vicentilla kun ano ang tinutuyo sang pagpost, apang ginalantaw niya ang posibilidad nga ini ang may kaangtanan sa sinuyaay.
Ang personnel ang assigned sadto sa isdaan nga bahin sang merkado, apang may-ara sang nangin isyu.
Bangod ang kaupod nila ang may sala, kag ang mga ini ang mabuot man nga mga persona, sila ang ginpabalik lamang sa merkado.
Naluoy ini sa duha ka personnel nga suno sa vendor nagapaningkamot lamang kag nagasalig sa ila sweldo para mapakaon ang pamilya.
Pahanumdom sini sa nagpost online nga paminsarun kuntani kun ang tripping ang maka-apekto sa trabaho sang indibidwal, bangod indi lamang isa ang maapektuhan kundi ang tanan nga nagasalig sa ila sweldo.
Nagalaom si Vicentilla nga indi masuspender ang mga personnel bangod sila ang wala man sang sala.












