Ginhatagan ni Bacolod City Mayor Alfredo “Albee” Benitez sang financial assistance ang mga vendors sa Bacolod Central Market nga nasunogan gikan sa personal sini nga kwarta.
Sa interview sang Bombo Radyo Bacolod kay Secretary to the Mayor Atty Marty Go, wala pa gihapon mahatag sa mga stall owners ang financial assistance gikan sa Department of Social Welfare and Development (DSWD) paagi sa Bacolod City Department of Social Services and Development (DSSD).
Ini bangod madamo pa sang proseso nga pagalabyan kag may mga requirements pa nga ginapangayo.
Apisar nga on-leave kag yara sa abroad, kaina sang aga ang alkalde ang nagpadala sang bulig pinansyal sa mga apektado nga ginpanagtag nanday Bacolod City Lone District Congressman Greg Gasataya kag pila ka mga konsehal.
14 ka tenants nga totally damaged ang stalls ang nakabatun sang tig-P50,000 nga cash assistance samtang 11 naman nga partially damaged ang stall ang ginhatagan sang P25,000.
Nahibaluan nga ang financial assistance nga mabatun sang mga vendors gikan sa DSWD ang yara sa P15,000 para sa totally damaged kag P10,000 sa partially damaged nga stalls.
