Nagapati ang Officer in Charge sang Libertad Public Market nga tagsa ka vendor sa merkado ang may magkatuhay nga mga sentimyento apang ang mga vendors sang Libertad Public Market ang magasunod sa luyag ipatuman sang gobyerno lokal.
Suno kay Jona Abao, nakapatigayon na sila sang paghinun-anon sa mga vendors kun sa diin nagpabutyag ang mga ini sang ila tagsa-tagsa ka mga sentimyento kag apprehension sa mga matabo ilabi na sa pool testing.
Suno diri, sa kapin 1,269 ka mga manugbaligya nga ginalakipan sang legitimate awardees ukon ang awarded nga vendors sa sulod sang Libertad public market nga yara sa Contract of Lease sang syudad kag mga transient vendors nga ginbutang sa annex sang mercado, 463 lamang diri ang nagconfirm nga magapaidalom sa pool testing sa COVID-19.
Aminado man ini nga indi nila makuha ang 100 percent nga mapasugot sa pool testing bangud man sa nanasari-sari nga reaction ilabi na karun nga yara sa MECQ ang syudad, kapin 60 ka mga bloke sang merkado ang sirado.
Wala pa man sila sang final notice kun san-o madayon ang pagpakighinun-anon nila kay Inter Agency Task Force deputy chief implementer for Visayas Retired General Melquiades Feliciano nga nacancel kahapon agud mahibaluan kun ano ang sarang mahimo bangud indi tanan ang makigbahin sa pool testing.
Nanamian man ini nga sa adlaw sang Sabado patigayunon ang testing bangud wala sang pagbaligya pagkaaga bangud sa Sunday lockdown kag sirado ang merkado publiko.
