Nagpatigayon sang noise barrage ang mga vendors sa Libertad Public Market angot sa issue sa plano nga swab testing sa ila.
Sa interview sang Bombo Radyo Bacolod kay Rolito, pinuno sang Alangilan Vegetable Vendors Association sa Libertad Public Market, gin-athag sini nga pabor sila sa plano nga swab testing sa mga vendors apang kuntani masabat lang ang pila nila ka mga palamangkutanon.
Suno diri, luyag lang nila mahibaluan kun ngaa ang mga vendors lang ang tuyo nga iswab kag indi pati ang mga bumalakal.
Dugang pa sini nga kun ngaa sa Bacolod City lang ini mandatory kag indi sa bilog nga pungsod.
Nagapangayo man ini sang kopya sang mando nagikan sa Malacañang bangud suno kay Rolito, ginhambalan sila nga ang national government mismo ang nagapatuman sini.
Magluwas diri, luyag man sang mga vendors nga maathagan kun ano ang matabo sa ila bangud nga pagkatapos sang mga ini ma-swab, pwede man sila sa gihapon makabaligya.
Suno kay Rolito, mas delikado kag mabudlay kun magbaligya sila pagkatapos nga ma-swab bangud nga pananglitan nga magpositibo sila, mas mabudlay ang contact tracing sa mga naka-closed contact nila nga mga bumalakal.
Ginpasiguro man sini nga magapadayon ang ila noise barrage kun indi sila sa gihapon mapaathagan sang mga opisyal.
Nahibaluan nga subong kuntani nga adlaw natalana ang swab testing para sa mga vendors apang ginpaisol ini sa Oktubre 10.
