Ginpahayag sang pinuno sang Department Of Social Services & Development (DSSD) Bacolod City nga ginakonsiderar nila sa pagpili sang venue para sa distribution sang ayuda nga indi mabutang sa delikado ang tanan nga benepisyaryo.
Sa interview sang Bombo Radyo Bacolod kay Dr. Richelle Verdeprado-Manga, ginakasubo nila ang nabaton nga impormasyon nga may isa ka delivery rider ang napatay samtang nagapila agud nga magkuha sang ayuda.
Suno kay Verdeprado-Manga nga ang natabo ang isa ka wake-up call agud nga maimprubar pa ang ila systema sa pay-out sang cash assistance.
Suno diri bukas sila para sa mga innovations kag may yara sila sang mga plano nga ginahimo apang dapat sulod sa guidelines sang Commission on Audit (COA).
Dugang pa sini ginatinguhaan man nila nga mahimo digitalize ang pay-out apang sa karun ang basic nga ginahimo nila sa pay-out ang face to face.
Suno pa diri crucial ang mga logistics gani sa ciudad sang Bacolod ginatunga ang pay-out sa tion nga madamo ang kinahanglan nga ma-releasan kag ginadamo man nila ang venues.
Naga-partner man sila sa iban nga mga private institutions para sa facility nga gamiton sa pay-out.
Ginpahayag man sang pinuno sang DSSD Bacolod nga isa man sa ginalantaw nila ang tuman ka init nga panahon gani ang venue ang dapat maayo ang ventilation kag may available nga mga medic ingkaso nga kinahanglan.
Sa pihak nga bahin, padayon pa nga ginahulat ang sabat sa appeal sang tres mil ka mga tricycle drivers nga wala madala sa pay-out sang nagligad.
