Kadungan sa pagsaulog sang ika-82 nga anibersaryo sang Araw ng Kagitingan sa Bacolod City Public Plaza, nagpanawagan naman ang mga veterans nga ihatag sa ila ang mga benepisyo nga nakapagkit sa konstitusyon.
Sa interview sang Bombo Radyo Bacolod kay Col. Jerzon Juarez, Presidente sa Veterans Federation of the Philippines, ginpahanumdom sini nga nakapagkit sa konstitusyon nga ang gobyerno ang dapat nga maghatag sang aid, benefits kag iban pa nga financial assistance sa mga veterans, ila pamilya kasubong man sa federation.
Apang ang pagtuman sa layi ang nakadepende naman sa tagsa ka mga local government units (LGUs).
Pangabay ni Juarez nga mahatag ang nagakadapat nila nga benepisyo.
Aminado ini nga sadto may ginahatag nga allowances para sa mga veterans sang 2nd World War, apang ini ang nauntat na sa ila bangod sa ginalantaw sini kulang sa ihibalo natuhoy sa layi.
Pahayag ni Juarez nga sila ang wala sang suporta gikan sa ciudad bangod wala man lamang sila ginhatagan sang opisina kag wala man sang may ginahatag nga allowances.
Paathag sini nga isa nalang ang nabilin sa Bacolod City nga veterans sa World War II kag kalabanan ang napatay na, apang may-ara sang ginatalana nga pondo para sa pension sa kada tuig, nga dapat ihatag man sa ila nga mga nagasunod.
Bangod sa kakulang sang benepisyo, madamo sa ulihi nga nagretiro nga wala na nagsulod sa Veterans Federation of the Philippines.
Paathag sini nga tanan nga banwa kag ciudad ang may organisasyon para sa mga veterans, apang ini ang wala ginhatagan sang pondo sang Kongreso.
Pahayag pa sini nga kun pension lamang ang ila nga saligan, ini ang kulangon bangod sa kadako sang mga gastos kaangay lamang sang medication kag transportasyon.
Suno pa kay Juarez, humalin pa sadto puro lamang pasalig ang ila nagakabaton kun sa diin ang mga veterans sa karun ang nangin kaangay na lamang sa dekorasyon sa ciudad.
