Nagfile sang 19 counts of cyberlibel ang beteran nga aktor nga si Vic Sotto batok sa director nga si Darryl Yap kahapon, kasunod sa ginrelease nga film teaser nga gina-feature ang late nga aktres nga si Pepsi Paloma, kun sa diin ginmensyonar ang pangalan ni Sotto.
Ginkumpirmar sang legal counsel ni Sotto nga si Atty. Enrique Dela Cruz, nga ginfile ang kaso batok kay Yap sa Muntinlupa Regional Trial Court (RTC).
Nag-abot sa Muntinlupa Regional Trial Court ang aktor kaupod ang asawa sini nga si Pauleen Luna.
Sa teaser sang “The Rapists of Pepsi Paloma”, ginpamangkot ang aktres nga nagaportray kay Paloma kun siya ginhimuslan ni Vic Sotto kag nagsabat ini nga ‘Oo’.
Suno kay Sotto, naghipos lang ini sadto angot sa nagviral nga videos apang nagdesisyon ini sa karun nga mangita sang hustisya.
Suno pa diri, wala sang bisan sin-o man gikan sa movie production ang nagkonsulta ukon naglisensya man sa iya.
Apang, nagpa-athag man ini nga wala siya sang problema sa mga aktor sa pelikula nga nagahimo lang sang ila trabaho.
Sang ginpamangkot naman si Sotto kun ano ang mensahe sini kay Yap, iya lamang gingreet ang direktor nga “happy new year”.
Gilayon naman nga nag-order ang Muntinlupa RTC nga dulaon ang film trailer.
Ginpahayag na ni Yap sang tinalikdan pa nga ang pelikula sini ang wala sang may kaangtanan sa TVJ, ang pangalan nga gingamit para kay Tito Sotto, Vic Sotto, kag Joey de Leon, apang ang pelikula ang may kaangtanan lamang sa natabo kay Paloma.
Apang, wala naman sini gindeny nga ang TVJ ang iga-feature sa pelikula.
