Ginpahayag sang vice chairperson sang committee on finance sa House of Representatives nga si Iloilo 1st District Representative Janette Garin nga madamo sang nagtuhaw nga mga palamangkuton sa ginapangayo sang Office of the Vice President nga P500 million nga confidential fund.
Sa interview sang Bombo Radyo kay Congresswoman Garin, indi lamang ang opisina sang bise presidente ang nagapangayo sang confidential fund apang madamo sang nabaton nga pagkwestyon si Vice President Sara Duterte bangod kun ikumparar sa termino ni former Vice President Leni Robreado, wala ini sang may ginpangayo nga confidential and intelligence fund.
Suno diri, isa man sa nangin palamangkutanon amo ang P125 million nga confidential fund nagikan sa Office of the President nga ginhatag sa Office of the Vice President.
Gin-athag ni Garin nga ang paggamit sang confidential fund ang dapat may husto nga pag-eksplekar kun diin gamiton kag kun ano ang benepisyo sini para sa opisina agud wala sang pagduda nga matabo.
Ang nasambit nga confidential fund ang ginagamit sa pagdeterminar sa illegal drugs, terrorism, smuggling, contact tracing, intel operations, ukon pagprovide sang safe house para sa mga witness ukon whistle blower.
Ini man ang ginapangayuan sang report kun diin gingamit ang budget apang wala ginabutang ang specific nga record.
Sa bahin naman sa posibilidad nga gamiton sa korapsyon ang kwarta, suno kay Garin, yara sa Department of Budget and Management ang trabaho para magtsekyar kun ano nga ahensya ang hatagan, padal-an kag gamitan sang confidential fund.
