Matapos ang binulan nga espekulasyon, ginkumpirmar ni Vice Ganda kag Ion Perez nga nagpaidalum na sila sa wedding commitment ceremony ukon kasal sang late 2021.
Sa isa ka 14-minute vlog nga ginpost kahapon, Pebrero 13, ginpakigbahin sang comedian-host ang videos sang ila simple nga seremonya sa Las Vegas Chapel sa Nevada, USA.
Santo sa art card nga ginpost ni Vice Ganda isa ka oras antes ginrelease ang vlog, ang seremonya ang natabo sang Oktobre 19, 2021.
Sa ila nga pagbayluhanay sang vows, ginpahayag sang emosyonal nga si Ion nga bug-os tagipusuon ang iya nga desisyon nga makaupod ang komedyante kag wala na ini sang iban nga mahambal magluwas sa tuman niya ini ka palangga.
Sabat naman ni Vice Ganda nga tuman ang iya nga kalipay nga si Ion ang iya nga makaupod sa amo nga tion, sa nakaligad kag sa palaabuton, kag pangamuyo sini nga tubtob sa masunod nga tion ini gihapon ang iya nga kaupod.
Dugang pa ni Vice nga sa tanan sini nga buhaton sa kabuhi, isa sa mangin inspirasyon sini amo si Ion nga amo ang rasun sini sa tanan niya nga achievements.
Ginpromisa man sang komedyante nga si Ion ang isa sa rasun kun ngaa luyag pa sini nga magpadayun sa kabuhi.
Gintapos sang couple ang clip pinaagi sa pagpakigbahin sang videos sang ila nga singsing, sang ila nga pirmado nga certificate of commitment, kag dugang pa nga litrato sang seremonya.
Madumduman nga sa karun, indi pa legal sa Pilipinas ang same-sex marriage.
Una nga ginkompirmar ni Vice kag ni Ion ang ila nga relasyon sang tuig 2019.
