BACOLOD CITY — Indi lamang mangin eksklusibo sa mga pumuluyo nga maapektuhan sang pagpatukod sang ship-recycling plan sa Barangay Bacuyangan, banwa sang Hinobaan ang relocation site nga ginpainan sang daku nga pundo sang provincial government sang Negros Occidental.
Ini ang ginklaro ni Vice-Governor Eugenio Jose “Bong” Lacson kasunod sang paandam sang grupo nga Green Alert nga magapasaka sang kaso pananglitan indi sila mahatagan sang dokumento angot sa pagakadtuan sang 20 milyones pesos nga gin-alokar para sa relocation site sa patukuran sang shipyard sa Hinobaan.
Nahibaluan nga nagpadala sang sulat ang environmentalist group kay Atty. Macky Ascalon sang secretariat sang Sangguniang Panlalawigan agud maghingyo sang nagakaigo nga papeles kag pananglitan indi sila mahatagan, magapasaka sila sang kaso.
Paathag sang bise-gobernador, apisar ang mga madislokar nga residente ang prayoridad sa relocation site, mahimo man makaangkon sang lote ang mga informal settlers sa iban nga bahin sang Hinobaan.
Ang lote ang nagalapad sang masobra 14 ektariyas kag nagabalor sang kapin 15 milyones pesos.
Pananglitan mapaslawan ang Hinobaan nga makakita sang relocation site, ang pundo ang igabalik sa kaban sang provincial government.
