BACOLOD CITY — Nagpaidalom sa drug test si Negros Occidental Vice Governor Eugenio Jose Lacson kasunod sang alegasyon ni anay punong barangay Mauel Huelar nga isa siya ka drug user.
Kahapon, nagpa-drug test si Lacson sa isa ka pribado nga hospital sa Bacolod kag nag negatibo ang resulta sini.
Sa resulta sang tests nga pirmado sang analyst nga si Karen Mae Mallorca Dela Cruz kag head sang laboratory nga si Dr. Melanie Rose Serodo lunsay negatibo si Lacson sa methamphetamine kag tetrahydrocannabinol test.
Ang nasambit nga mga test ang nagatumod kun nagagamit sang shabu kag marijuana ang pasyente.
Suno sa bise-gobernador, maayo man ang resulta sang iya nga stress test sa isa naman ka kilala nga hospital sa Manila antes pa man ang paguwa sang affidavit ni Huelar.
Samtang, nagalaom si Lacson nga mapamatud-an ni anay Barangay 35 punong barangay Manuel Huelar ang mga akusasyon sini.
Nahibaluan nga nakabutang sa affidavit ni Huelar nga drug user si Lacson bangud sa mamala sini nga pamanit kag iban pa gid nga panghulag-hulag nga iya sang nagagamit sang iligal nga druga.
Suno kay Huelar, wala sang ginahimo si Lacson agud tapnaon ang negosyo sang iya utod nga si Manuel “Manolet” Lacson bangud diri man siya mismo nagakuha sang supply nga iya ginagamit.
Sa press conference sang bise gobernador, ginpahayag sini nga may yara siya sang ideya kun sin-o ang yara sa likod sang affidavit nga ginpagwa ni Huelar apang indi patas kun siya mismo ang magahingalan.
Bangud sini, nagalaom si Lacson nga ibuyagyag ni Huelar kun sin-o ang nagsugo sa iya agud ipagwa ang affidavit.
Indi man madula suno sa bise gobernador nga pulitika ang motibo sa likod sini apang ang isyu sa karon suno sa iya amo ang pagpamatuod sang anay punong barangay nga user gid man ini sang iligal nga druga.
Suno kay Lacson, nakahanda siya nga magpaidalom sa drug test agud pamatud-an nga wala siya nagagamit sang druga.
May kaangtanan sini, nagalaom ang national commander sang Task Force Kasanag nga si John Chong nga maimbestigaran sang maayo ang kaundan sang affidavit ni Huelar.
Aminado si Chong nga nakibot siya sa paggwa sang affidavit ni Huelar gani nagaapela ini sang patas nga imbestigasyon kag indi lang basta-basta nga patihan.
