Nag-take oath na kahapon ang pila ka mga ginproklamar nga nagdaog sa ginpatigayon nga 2022 Local Elections sa Negros Occidental.
Aga pa kahapon nga nagpadulong sa Municipal Trial Court in the Cities (MTCC) branch – Bago City sa sanday reelected Vice Governor Jeffrey Ferrer kag 4th District Congresswoman Juliet Marie “Yoyette” Ferrer sa atubang ni Judge Irene Binghanoy agud nga magpanumpa para sa pwesto.
Nahibaluan nga ang bise gobernador ang rehistrado nga botante sa syudad sang Bago.
Samtang temprano paman nga nagpadulong si 5th District Congressman-elect Atty. Dino Yulo sa Office of the Governor agud nga magtake oath sa atubang ni Negros Occidental Governor Eugenio Jose “Bong” Lacson.
Ini ang nagtuga naman sang mga espekulasyon nga si Yulo ang mahimo magasulod sa lokal nga partido nga ginapangunahan ni Lacson, ang LOVE Negros.
Nahibaluan nga si Yulo ang nagpapili sa 2022 Election bilang independent candidate.
Sa pahayag ni Congressman-Elect Atty. Dino Yulo, nga ang pwesto sini ang yara sa idalum sang pagpamuno sang gobernador gani wala ini sang makita nga malain sa pagtake-oath sa atubang ni Governor Lacson.
Apang wala naman ini may ginbuy-an nga bisan ano nga pahayag may kaangtanan sa pagsulod sa lokal nga partido.
Paathag ni Yulo nga ang pagtake oath sa atubang sang gobernador ang pagpakita sang pagpakig-isa sini ukon sa paghugpong para sa kaayuhan sang Negros Occidental.
