Gin-athag sang bise alkalde sa syudad sang Bacolod nga fake news ang nagalapta nga balita nga may yara sang patigayunon nga lockdown.
Sa interview sang Bombo Radyo Bacolod kay Bacolod Vice Mayor El Cid Familiaran, indi matuod ang nagalapata nga impormasyon sa social media nga ipaidalum sa lockdown ang syudad subong nga bulan sang paskwa.
Suno kay Familiaran, wala sang rason nga ipaidalom sa lockdown ang Bacolod bangud padayon ang pagnubo sang mga bag-o nga kaso sini sang COVID-19.
Ginpahayag man sini nga wala sang restrictions ang halin sa probinsya sang Negros Occidental kag Panay ang hilway nga makapadulong sa syudad.
Gin-athag man sini nga ang mga moratorium sang syudad sang Bacolod nga epektibo sa Disyembre 21,2020 tubtob Enero 3, 2021 ang para lamang sa LSIs )(Locally Stranded Individuals) sagwa sang Region 6 (Western Visayas).
Samtang ang mga Overseas Filipino Workers (OFW) kag ang Authorized Person Outside Residence (APOR) ang mahimo makasulod sa syudad.
