Gin-athag sang acting mayor sa ciudad sang Bacolod nga indi pagpigos sa mga pigado ang pagbawal sa paggamit kag pagbaligya sang iligal nga butane kundi agud malikawan ang disgrasya.
Sa interview sang Bombo Radyo Bacolod kay Bacolod City Vice Mayor El Cid Familiaran, matapos ginpatuman ang pagkumpiskar sang mga butane canisters gikan sa mga vendors sa nagkalainlain nga merkado sa ciudad, madamo ini sang nabasahan nga mga nagareklamo.
Panindugan sang mga ini nga butane lang ang masarangan kag wala sang ikasarang sa pagbakal sang gasul.
Paathag ni Familiaran nga nakita sa pagtuon sang Bureau of Fire Protection (BFP) – Bacolod nga kalabanan sa mga nagaluntad nga sunog ang bangod sa naglupok nga mga butane.
Pahayag sang bise alkalde nga ang pilian lamang amo ang pagbakal sang medyo mahal apang safe ukon magbakal sang barato apang may dako nga tyansa nga makatuga sang sunog.
Panindugan sini nga wala nila ginapigos ang mga pigado kundi ginkumpiskar lamang ang mga butane nga illegal kag delikado.
Panugyan na lamang sini sa mga nagabaligya nga magpangita na lamang sang lain nga negosyo samtang sa naga-usar naman nga magpangita sang mas safe nga pamaagi sa pagluto.
Panindugan sang bise alkalde nga ini ang pamaagi man agud mahalungan ang pamilya, bangod kun indi tapnaog, mahimo nga hinulsulan lamang sa ulihi.
Pahanumdom ni Familiaran nga mga illegal nga butane canister ang ila nga ginakumpiskar, samtang may-ara naman sang mga legal nga mahimo mabakal.
Paathag sini nga wala sang problema kun may-ara sang permit sa pagbaligya, bangod ini ang magaseguro nga ang mga produkto ang nakasunod sa standard.
Magluwas sa mga butane canister, may ara man sang mga legal nag refilling station.
Paathag ni Familiaran nga ang City Ordinance No. 885 ang ginpagwa sadto pang 2019, kag na-implementar sang makadali apang ini ang nauntat sang magduging ang COVID-19.
Ang mga magalapas ang magapangatubang sang P3,000 tubtob P5,000 nga multa.
