Nagapanawagan si Bacolod City Vice Mayor El Cid Familiaran sa mga persona nga nagahimo sang prank paagi sa pag-order sang mga pagkaon gamit ang iya pangalan nga untaton na ang ginaubra bangud ang mga empleyado kag tag-iya sang negosyo ang makaluluoy.
Sa interview sang Bombo Radyo kay Familiaran, ginpahayag sini nga una nga gingamit ang iya pangalan sa pag-order sang lima ka gallon sang tubig sa isa ka water station sa Brgy. Granada kag nakibot ini sang may nagdul-ong sang 30 ka containers sang tubig sang iya opisina.
Suno sa iya, may nagpabalo man diri nga liwat nga gingamit ang iya pangalan sa pag-order sang beef stake sa isa ka coffee shop kun sa diin nagabalor P14,000 kag nagpangayo pa sang makahulubog nga ilimnon.
P12,000 naman ang balor sang pagkaon nga ginpaluto sa isa pa gid ka kalan-an sa ciudad kun sa diin ginpahayag nga 18 ka mga persona ang guest ni Familiaran kag nagpareserve didto.
Nagrequest man sang makahulubog nga ilimnon ang prank caller.
Natingala naman ang restaurant nga alas 2:00 na apang wala pa ang bise-alkalde gani ipahold kuntani anay ang order apang naluto na ini.
Suno sa iya, ang ginahimo sang mga nagapangpranka ang indi makaguba sa iya pangalan apang ang mga makaluluoy amo ang mga daily minimum wage workers nga posible sa ila icharge ang nauyang nga pagkaon subong man ang mga negosyante nga madako na nga daan ang kapierdehan bangud sa pandemic.
Gani nagpang-abiso ini sa mga nagahimo sang malain nga untaton na ang ginaubra bangud may yara sang karma.
