Nagapati si Bacolod Vice Mayor El Cid Familiaran nga paboran ni Mayor Evelio “Bing” Leonardia ang hingyo sang simbahan natuhoy sa pagpanubo sang curfew agud makapatigayon ang Simbang Gabi.
Madumduman nga nag-apelar ang simbahan nga idugon ang curfew nagikan sa alas-10:00 sang gab-i tubtob alas-4:00 sang kaagahon sa alas-10:00 sang gab-i tubtob alas-3:00 sang kaagahon.
Ginatuyo sang simbahan nga magpatigayon sang duha ka schedule sang misa sa kada adlaw agud indi magtingob ang mga sumilimba kag natalana ini alas-3:30 sang kaagahun kag alas-5:00 sang kaagahon.
Suno kay Familiaran, ginahulat pa sang alkalde ang session sang National IATF natuhoy sa apelar sini nga mapanaog ang status sang Bacolod nagikan sa General Community Quarantine (GCQ) nga mangin Modified General Community Quarantine (MGCQ).
Sa GCQ, ang curfew ang nakabutang sa alas-10:00 sang gab-i tubtob alas-4:00 sang aga samtang kun mangin MGCQ naman maidog ini sa alas-11:00 sang gab-i tubtob alas-4:00 sang kaagahon.
Apang wala ini gihapon nagasanto sa apelasyon sang simbahan nga oras para sa Simbang Gabi nga magasugod sa Disyembre 16.
Suno kay Familiaran, nagakunsulta na ang alkalde sa Emergency Operation Center (EOC) kasubong man sa Economic Team, kalakip na si Councilor Archie Baribar nga amo ang author sang curfew ordinance.
Ginalantaw naman nga magapagwa na sang Executive Order si Leonardia subong nga adlaw.
Nagpasalig naman si Familiaran nga ginakunsiderar ni Leonardia indi lang ang ekonomiya kasubong man ang aspeto sang nakaandan nga tradisyon sang mga kristyano nga pagpatigayon sang Simbang Gabi.
Nagapati naman ini nga pahanugutan sang alkalde ang apelasyon.
Suno kay Familiaran, nnakabutang sa ordinansa nga sa tion sang espesyal nga sikumstansya kaangay sang palaabuton nga paskwa, sarang mahatagan sang gahum si Leonardia nga ligwatun ang oras sang curfew kag indi na magakinahanglan sang amendments.
