Nagpungko na bilang acting mayor sa syudad sang Bacolod si Vice Mayor El Cid Familiaran matapos nga nagpadulong sa pungsod China si Bacolod City Mayor Alfredo Benitez matapos nga nangin kabahin siya sang delegates ni President Ferdinand “Bong bong” Marcos Jr sang nagpadulong ini sa nasambit nga pungsod para sa state visit.
Sa interview sang Bombo Radyo Bacolod kay Bacolod City Vice Mayor El Cid Familiaran, nag-umpisa ang pagpungko sini bilang acting Mayor kahapon, Enero 3 tubtob sa Enero 6.
Santo sa pagsulundan, kun ang isa ka alkalde ang nagbiyahe padulong sa iban nga bahin sang Pilipinas, bisan sin-o lamang ang iya iappoint agud mangin acting mayor apang kun ini ang magapadulong sa luwas sang pungsod, automatic nga ang bise alkalde ang magapungko bilang acting mayor.
Suno kay Familiaran, ang tanan nga ginatrabaho sang alkalde kaangay sang pagpirma ang pwede himuon magluwas nalang sang pagbaton kag pagpahalin sang mga empleyado.
Ginpahayag sang bise alkalde nga antes naghalin kahapon si Bacolod City Mayor Alfredo Benitez, nagtawag pa ini sa iya agud nga tsekyaron kun madayon ang klase kaina bangud sa paginulan apang wala man sang cancellation sang klase bangud yara man ang syudad sang yellow rainfall warning.
Nagpanugyan man ini sa mga pumuluyo nga indi maghubog sa tubig baha bangud delikado ang leptospirosis.
Kasubong man nagpanugyan man ini sa mga mangingisda nga magmonitor anay sang dalagan sang panahon antes magpalawod agud magpangisda.
