Nagpasalig si Bacolod City Vice Mayor El Cid Familiaran nga handa ini magbulig sa mga dialysis patients nahanungod sa problema nila sa kakulang sang mga dialysis center sa ciudad.
Madumduman nga nagpanawagan ang Negros Dialysis group sang dugang nga bulig nagikan sa ciudad sang Bacolod bangud kulang pa ang bulig nga nagikan sa Philhealth.
Nahibaluan nga libre sang Philhealth ang ila 90 sessions sa dialysis apang tubtob lamang ini sa bulan sang Oktubre, kag pag-abot sa bulan sang Nobyembre tubtob Disyembre sila na ang gagasto sini.
Sa interview sang Bombo Radyo kay Familiaran, iya ginpasalig nga pwede maka-istorya sa iya ano man nga oras ang nasambit nga grupo agud matumod kun ano ang posible mahimo sang ciudad.
Nagalaom man si Familiaran nga makahimo sang paagi ang mga kongresista sa probinsiya nga mapa-pondohan ang dugang nga mga dialysis machine ukon ang pagpatukod mismo sang dialysis center para sa tanan nga Negrense.
Sa karon, may yara gid lamang sang duha ka mga operational nga mga dialysis machine nga napahamtang sa Corazon Locsin Montelibano Memorial Regional Hospital.
