Nagapati ang chairman sang inter-agency task force against coronavirus sa ciudad sang Bacolod nga wala na sang rason nga ipaidalom pa sa RT-PCR test ang mga pasahero nga magaabot sa mga pantalan nagikan sa Iloilo bangud pareho lamang nga Modified General Community Quarantine ang status sang duha ka mga lugar.
Nahibaluan nga ginkasugtan nanday Bacolod City Mayor Evelio “Bing” Leonardia kag Iloilo City Mayor Jerry Treñas nga pahalugan ang mga pagsulundan sa pumuluyo nga magabiyahe Bacolod-Iloilo vice-versa.
Sa interview sang Bombo Radyo Bacolod kay Familiaran, ginpahayag sini nga kuntani kaangay sa kun paano ginapahanugutan ang pagsulod sang mga taga-probinsya sang Negros Occidental sa ciudad, amo man kuntani ang matabo sa tunga sang Bacolod kag Iloilo.
Panindugan ni Familiaran, nga kun ang mga nagikan sa Negros Occidental ang wala na gina-swab test sa pagsulod sa siyudad, wala sang rasun nga himuon ini sa nagikan sa Iloilo nga kaparehas lang nga MGCQ ang quarantine category.
Apang, dapat sa gihapon nga magsunod ang mga pasahero sa health protocols nga ginapatuman sa mga pier kaangay sang pag fill-out sang health declaration card kag mag-agi sa thermal scanning.
Dugang pa sini nga pamatuod lamang ang pagpaidalum sang mga lugar sa Western Visayas sa MGCQ bangud nga ginakabig na ini nga low risk areas sang national IATF.
