Patay ang vice mayor sang Aparri, Cagayan kag lima ka iban pa matapos nga gin-ambush ang ila ginasakyan nga van sa Bagabag, Nueva Vizcaya kahapon.// Santo sa report, nalakip si Aparri Vice Mayor Rommel Alameda sa mga napatay sa ambush.
Santo sa imbestigasyon, yara sa highway sang Barangay Baretbet ang van alas-8:45 sang aga kahapon sang nagpundo matapos nga ginharangan sang mga suspek nga naka-uniporme sang pulis ang kalsada gamit ang barikada sa isa ka eskwelahan.
Magluwas kay Alameda, patay man ang driver sang van kag apat pa ka sakay.
Samtang, ginpagwa na sang Nueva Vizcaya Police Provincial Office ang mga pictures nagikan sa CCTV footage sang salakyan nga ginapahayag nga ginapanag-iyahan sang gobyerno nga amo ang gingamit sang armado nga grupo nga nag-ambush sa mga biktima.
Ginpahayag man nga nagasanto ang salakyan sa ginlaragway sang mga nakakita sa ambush kag sa laragway sang salakyan nga nagpalagyo sa bahin sang Bagabag, Nueva Vizcaya.
Naka-alerto naman ang tanan nga banwa sa Nueva Vizcaya kag may ginapahamtang na nga mga checkpoints agud nga madakpan ang mga suspek.
Kasunod sini, nagmandu na si Philippine National Police Gen. Rodolfo Azurin, Jr. sang maid-id nga imbestigasyon sa pagpatay kay Alameda.
Kun madumduman, duha ka adlaw ang nakaligad, gin-ambush man ang convoy ni Lanao del Sur Gov. Mamintal Adiong, Jr.
Maswerte nga nakaluwas ang gobernador apang patay naman ang apat sini ka security personnel.
