Dako ang paglaum sang Department of Education Divison of Negros Occidental sa pag-abot ni Vice President kag DepEd secretary Sara Duterte sa selebrasyon sang World Teachers Month.
Sa interview sang Bombo Radyo kay Ian Arnold Arnaez, public information officer sang DepEd Division of Negros Occidental, pagahiwaton ang event sa Panaad Stadium sa Setyembre 8.
Suno diri, may yara sang ginpreparar nga mga activities para sa mga manunudlo kaangay na lamang sang dance showdown, jingle making, kag raffle draw nga may 991 prizes.
Ang selebrasyon ginhatagan sang budget sang provincial government kag si Negros Occidental Governor Eugenio Jose Bong Lacson mismo ang nag-imbitar sa bise presidente nga magbisita sa launching sang World Teachers Month.
Sa karun ginahulat pa ang kumpirmasyon sa appointment sang bise presidente.
Suno kay Arnaez, dako ang ila paglaum nga mag-abot si Duterte sa isa ka dako nga event para sa mga manunudlo.
Nagalaum man ini nga mahatagan sang tyansa ang mga manunudlo nga maatubang kag makapadangat sang ila isyu kag concerns sa sekretarya sang Department of Education.
Samtang, suportado man sini ang pagkakas sa mga poster sa sulod sang classrooms agud maka-focus ang mga estudyante sa klase.
Dugang pa sini, siya mismo nagakwestyon kun ngaa madamo sang mga nakatapik nga poster ukon charts sa mga dingding sang classrooms.
Samtang, all set na ang mga buluthuan sa pagbukas sang klase sa Agosto 29 kun sa diin as of August 23, masobra na sa 200,000 ang enrollees.
