Sekreto nga nagbisita si Vice President kag Education Secretary Sara Duterte sa Mariano G. Medalla Integrated School sa Araneta Street, Barangay Pahanocoy, Bacolod City kaina sang aga.
Sa interview sang Bombo Radyo sa principal nga si Herminio Remada Jr., nagdala si Duterte sang 250 ka bags nga may school supplies, food packs kag tubig para sa Grade 1 pupils.
Naghatag man sang 279 ka bags nga may school supplies, food packs kag tubig sa Grade 7 students.
Nagdala man ang bise presidente sang 47 ka laptops para sa mga manunudlo sa Mariano G. Medalla Integrated School nga gamiton sa teaching learning activities.
Suno kay Remada, overwhelmed siya kag ang mga manunudlo nga sila ang napili sang bise presidente nga kadtuan kag hatagan sang mga school supplies.
Suno diri, nakibot sila sa pagbisita sang DepEd secretary bangud wala gid nila ginlauman nga magaabot ini sa eskwelahan.
Nagpamangkot man si Duterte kun ano ang kulang sa ila nga eskwelahan gani nagpangayo si Remada sang dugang nga school buildings bangud kulang ini sa elementary kag secondary department, kag nagpangayo man ini sang bangko.
Suno kay Remada, hulaton sini ang response sang DepEd secretary.
Suno sa principal, simple visit lang ang ginhimo sang bise presidente nga masami niya nga ginahimo sa iban nga mga eskwelahan agud nga mahibaluan kun ano ang ila mga problema.
