Nagpanindugan si Vice President Leni Robredo nga tion na agud pangitaan sang paagi sang gobyerno nga mabuhin-buhinan ang palas-anon sang mga motorista kag sang mga konsumidor kadungan sang pagsaka sang presyo sang produktong petrolyo.
Sa interview sang Bombo Radyo kay Robredo sa iya nga pagbisita sa Negros Occidental, short-term solution ang paghatag sang ayuda sa mga drivers, farmers kag fishers.
Apang kinahanglan nga tun-an sang gobyerno ang mga paagi kun paano makontrol ang presyo sang produktong petrolyo.
Isa sa mga rekomendasyon suno sa bise presidente amo ang pagsuspend sang excise tax kun sa diin P10 ang mabuhin kada litro kun ini ang isuspendi.
May nagaduso man nga pilion lang ang isuspend kun sa diin ang ginagamit sang mga pigado kaangay sang diesel kag kerosene ang ipaiway samtang ipabilin naman ang sa gasolina bangud may ikasarang man ang nagagamit sini.
Nagapati si Robredo nga kinahanglan na nga magpatawag sang special session sang Kongreso para sa suspension sang excise tax apang antes pa man ang special session, sarang gid nga makadecide ang presidente, santo sa iya nga gahum.
Kun ano man ang ginapahanugutan nga paagi para sa suspension, ini na ang husto nga tion agud nga maghulag suno kay Robredo bangud mas mabug-at ang epekto sini kun madugayan.
Kun magnubo ang presyo sang produktong petrolyo suno sa bise presidente, igabalik naman ang excise tax bangud apektado ang revenues sang gobyerno.
