Ginbisitahan ni Vice President Sara Duterte ang mga biktima sang Bagyo TINO sa pila ka local government units sa Negros Occidental kun sa diin nagpatigayon sang aid distribution ang Office of the Vice President.
Lakip sa ginpadulungan sini ang Himamaylan City National High School kun sa diin masobra isa ka libo nga mga apektado sang Bagyo ang nahatagan sang foodpacks.
Sa interview sang Bombo Radyo Bacolod kay Office of the Vice President Panay – Negros Island Region satellite office head Dr. Chris Sorongon, consistent na nga ginahimo sang OVP ang relief operations kun may-ara sang mga aktibidad.
Kaangay sang linog sa Cebu kun sa diin ang OVP man ang kalakip sa mga nauna nga nagbulig.
Kalakip sa family foodpacks ang lima ka kilo nga bugas kag anom ka delatas.
Sila ang naghatag man sang water containers.
Luwas sa Himamaylan City, ang OVP ang nagpalab-ot man sang bulig sa banwa sang Binalbagan, Moises Padilla, La Castellana, La Carlota City, Bago City kag pila ka Barangay sa Bacolod City.
Suno kay Sorongon, dako nga butang ang personal nga pagbisita sang Bise Presidente, nga pagpakita sini sang pagsuporta kag simpatya sa mga biktima sang Bagyo.
Pahayag sini, nga nagpatuman mismo sang programa nga emergency relief center ang Bise Presidente sa OVP agud maseguro nga may natalana gid nga budget ang ahensya para sa pagresponder sa mga kalamidad kaangay sang bagyo, linog kag iban pa.
