Nagfile sang resignation si Vice President Sara Duterte bilang miyembro sang gabinete, ukon bilang tiglikom sang Department of Education (DepEd) kag Vice Chairperson sang National Task Force to End Local Communist Armed Conflict (NTF-ELCAC), epektibo sa Hulyo 19, 2024.
Suno kay PCO Secretary Cheloy Garafil, wala na naghatag pa sang rason si Duterte, apang gin-athag sini nga padayon ini nga magaserbe bilang bise-presidente.
Wala pa man sang may ginpagwa nga impormasyon ang PCO kun sin-o ang magabulos kay Duterte bilang DepEd Secretary.
Sa madumduman, gin-ako ni First Lady Liza Marcos nga wala ini nakumporme sa ginhambal sang amay sang bise presidente nga si former President Rodrigo Duterte, nga “bangag” ukon nagagamit sang illegal nga druga ang bana sini nga si President Marcos.
Sang Pebrero, ginpahayag sang bise presidente nga wala ini sang isyu kay Marcos apisar sa natabo nga pagpanuya sang amay sini kag sang iya utod nga si Davao City Mayor Sebastian ”Baste” Duterte sa presidente.
Samtang, nagpahayag naman si Marcos nga wala ini nakakita sang ano man nga rason kun ngaa kinahanglan nga islan si Duterte sa kabinete.
