Nangin dinapit nga bisita sa 116th Founding Anniversary kag Tourism Industry Jumpstart sang Kabankalan City si Vice President Sara Duterte kahapon.
Ang Kabankalan City sadto isa lang sa mga barangay sang banwa sang Ilog, tubtub nga sang March 14, 1907 base sa Philippine Commission Act No. 1612 napasar ang Kabankalan bilang kabahin sang ika-22 nga municipalidad sang Negros Occidental.
Madumduman nga sadtong August 2, 1997 paagi sa virtue sang Republic Act 8297, nangin isa ka component city ang Kabankalan sa probinsya kag karon isa na sa progresibo nga syudad sa Negros Occidental.
Nangin dinapit nga bisita ang bise presidente bangud nangin kaalyado sang pamilya Duterte si Kabankalan City Mayor Benjie Miranda sa politika sang nagpadalagan bilang alkalde sang ciudad sang Kabankalan sang 2022 kag nagdaug.
Ginpangunahan man ni VP Sara ang oathtaking sang tourism council sang Kabankalan City.
Sa speech ni Duterte, gindayaw sini ang syudad sang Kabankalan para sa plano sini nga mas pasanyugon pa ang turismo nga mangin taytay nga mas mapamaayo ang international standing sa global tourism circuit sang pungsod.
Ginpahayag man sini nga ang Office of the Vice President (OVP) ang masami nga nakahanda sa pagbulig sa syudad sang Kabankalan sa Negros Occidental sa paghatag sang mga proyekto para kalinong kag entrepreneurship kaangay sang Peace 911 kag Magnegosyo ‘Ta Day.
