Nagpamalibad si Vice President Sara Duterte nga maghatag sang komento may kaangtanan sa nangin pahayag ni President Ferdinand “Bongbong” Marcos Jr. kun sa diin ginkumpirmar sini ang nagalapta nga mensahe nga ginhingyo sini ang mga Kongresista nga indi mag-file sang impeachment complaint batok sa bise presidente.
Suno kay VP Sara, indi anay ini maghatag sang komento sa mga remarks ni President Marcos.
Ini ang nangin pahayag ni VP Duterte sa interview kahapon sa Veterans Memorial Medical Center kadungan sa liwat niya nga pagbisita kay OVP Chief of Staff nga si Atty. Zuleika Lopez.
Madumduman sang Byernes, gin-enganyo ni Marcos ang mga mamalidha nga indi na magpasaka sang reklamo batok kay VP Duterte bangud indi man ini importante.
Nagpamalibad man nga maghatag si VP Duterte sang komento sa nangin pahayag sang Presidente nga “never say never” angot sa ila relasyon nga una na niya nga gintawag nga “point of no return.”
Samtang sa pihak nga bahin, ginapahayag nga nakagwa na sa Veterans Memorial Medical Center (VMMC) si Usec. Zuleika Lopez kahapon, Sabado.
Suno sa source sang Bombo Radyo, may release order ini nagikan sa Kamara kasunod sang pagtapos sang ginpanaog nga napulo ka adlaw nga detention.
Una nga ginpanaugan ini sang lima kaadlaw nga detention apang bangud sa indi sini pagtambong sa nakaligad nga hearing, ginpalawig ini sang napulo ka adlaw
Sabaylo naman nga sa House of Representative madetain ang chief-of-staff ni Vice President Sara Duterte, ginhingyo sang kampo sini nga sa ospital na lamang magpabilin bangud sa naeksperyensyahan sini nga tuman nga stress kag trauma.
Wala pa man sang ginpagwa nga pahayag ang bahin sini kun sa diin magatinir si Usec. Lopez matapos ini mapriso bangud sa contempt nga ginpatuman sang House committee on good government and public accountability.
