Wala nagtambong si Vice President Sara Duterte sa National Bureau of Investigation (NBI) sang Biyernes agud i-eksplekar ang iya pahayag nga nagmando ini sang isa ka persona agud patyon si President Ferdinand Marcos Jr. kun mangin madinalag-on ang isa ka assassination plot batok sa iya.
Suno kay Atty. Paul Lim, legal counsel ni Duterte, nagpahayag si Duterte nga indi ini makatambong apang wala naman gin-elaborate kun ngaa indi makadayon ang bise-presidente sa imbestigasyon.
Nag-issue ang NBI sang isa ka subpoena kay Duterte agud pahanugutan ini nga mag-eksplekar sang iya ginaalegar kill order batok sa Presidente, kay First Lady Liza Araneta-Marcos, kag House Speaker Martin Romualdez kun siya ang mapatay.
Siya ang gin-imbestigahan bangud sa ginaalegar grave threats in relation sa Cybercrime Prevention Act of 2012 kag posible nga bayolasyon sang Anti-Terrorism Act of 2020.
Una na sini nga ginpahayag nga ang iya mga pahayag batok sa First Couple kag kay Romualdez ang maliciously taken out of logical context.
