Nag-request ang Victorias City Government sang pahanugot sa Bacolod City Government sa paghaboy sang 30 cubic meters nga residual waste kada bulan sa sulod sang isa katuig sa sanitary landfill sang ciudad.
Sa interview sang Bombo Radyo Bacolod kay Bacolod City Legal Officer Atty. Karol Joseph Chiu, gin-aprubahan naman sang Solid Management Board sang Bacolod City ang nasambit nga request.
Suno kay Chiu, ang request ang ginapahanugutan man sang layi paagi sa cooperations between Cities nga magbuligay sa waste management.
Suno sa City Legal Officer, ginpasa na nila sa Sangguniang Panlungsod sa ciudad sang Bacolod ang request sang Victorias City Government apang wala pa sang impormasyon kun ano ang desisyon sang mga ini.
Suno diri mahimo pasugtan sang ciudad sang Bacolod ang request paagi sa Inter City Cooperation kag manugbukas naman ang Cell Number 5.
Dugang pa nga kun maaprubahan sang SP ang hingyo sang Victorias City wala ang mga ini bayaran sa bahin sang ciudad kag wala pa sang City Ordinance angot diri, apang wala pa mahibaluan ang sa bahin sang ISWIM, ang garbage hauler sang ciudad sang Bacolod.
Nagpadulong sa ciudad sang Bacolod ang City Environment and Natural Resources Office sang Victorias City agud idul-ong ang request nga masulod sa agreement para sa paghaboy sang residual waste nga gin-aprubahan man sang ila nga Sangguniang Panlungsod.
