Opisyal na nga gin-anunsyar ni Victorias City Mayor Javier Miguel Benitez nga magapapili ini sa bilang kongresista sa Third District sang Negros Occidental sa 2025 midterm elections.
Ginpatigayon ni Mayor Javi ang announcement sa District-wide Padayon Assembly sa Victorias City Coliseum sini nga Byernes sang hapon.
Ang announcement ang gintambungan sang tiyo sini nga si TESDA Director General Kiko Benitez, ang iya amay nga si Bacolod City Mayor Alfredo Benitez, ang iya iloy nga si Nikki Benitez kag pila ka mga alkade kag opisyales sa probinsya.
Nahibaluan nga si Abang Lingkod Partylist Representative Stephen Paduano ang nagatindog nga caretaker sang Third District tubtob sa eleksyon.
Sang tinalikdan may mga impormasyon nga nagagwa ang alkalde sang ciudad sang Victorias ang ginaduso agud nga magbulos sa tiyo sini matapos nga nagbakante ang pwesto bangud gin-appoint ini sang presidente nga mangin TESDA Director General.
Sa speech ni Mayor Javi Benitez, ginpasalamatan sini ang tanan nga mga residente sa ciudad sang Victorias nga nagsalig kag nag-upod sa iya para sa matam-is nga handom para sa ciudad sang Victorias.
