Ginpakigbahin sang hepe sang Victorias City Police Station nga bisan wala pa makapapanaog sang mando ang higher headquarters, gilayon man ini nga nagpanaog sang mando nga imonitor ang mga himata kag mismo puluy-an sang mga pugante sang mahibaluan sini nga tatlo sa mga nakapalagyo nga priso sa Negros Occidental District Jail (NODJ) ang taga Victorias.
Nahibaluan nga ang mag-utod nga Marvin kag Danilo Celeste ang mga residente sa Sitio Tima, Barangay Gawahon, Victorias City nga lunsay napatay matapos malagyo kag magbato sa kapulisan kag si Alejandro Montoya naman ang residente sa Barangay Tisol, Victorias City nga padayun pa nga ginapangita.
Si Daniel Tamon naman nga nadakpan liwat ang residente sa Salvador Benedicto samtang si Francisco Epogon, nga ginapatihan lider sang Epogon Robbery Group nga padayun man nga ginapangita, ang residente sa syudad sang Sipalay.
Suno kay P/Lt. Col. Eduardo Corpuz, hepe sa Victorias City Police Station, Sa tion nga mapamatud-an nga yara sa lugar ang pugante, gilayon man ini nga paga-arestuhon sang mga kapulisan.
Tubtob sa karun, pasalig man sang hepe nga padayun ang pagbantay sang mga police personnel sa mga himata sang pugante kag puluy-an.
Samtang pasalig naman ni Corpuz nga bisan ang mga kaiping nga mga barangay ang padayun man nga ginamonitor pinaagi sa Barangay Information Network nga nagpasalig nga wala pa makalabay sa ila ang pugante.
Samtang sa mga may impormasyon ukon makasiplat sa nahamtangan sang duha ka nabilin nga pugante, panugyan sang hepe nga gilayon nga ipadangat sa mga kapulisan kag gilayon man nila ini nga ipahibalo sa Bureau of Jail Management and Penology.
Panugyan man ni Corpuz sa mga pugante nga magsungka nalang bangod mas maayo gihapon ang pagbayad sa kasal-anan nga makaupod pa ang palangga sa kabuhi sangsa ang mga pinalangga nalang ang magabisita, apang sila ang yara na sa lulubngan.
