Ginpasalig sang hepe sang Victorias City Police Station nga nakahanda sila nga mag-assist kun makig-angot sa ila ang pamilya sang isa sa nabilin nga pugante gikan sa Negros Occidental District Jail nga si Alejandro Montoya.
Madumduman nga ang nabilin nalang nga mga pugante nga padayun pa nga ginapangita amo sanday Alejandro Montoya nga residente sa Barangay Tisol, Victorias City, Negros Occidental kag si Francisco Epogon nga ginaalegar lider sang Epogon Robbery Group.
Samtang naghibaluan nga antes pa mapatay sang otoridad si Danilo Celeste, nga isa man sa mga pugante, nakig-angot naman sa Victorias City Police Station ang utod sini para sa plano nga pagsungka.
Suno naman kay P/Lt. Eduardo Corpuz, wala pa sang may nakig-angot sa ila nga bisan isa sa mga himata ni Montoya.
Ginpakigbahin naman ni Corpuz nga kabahin sang Seva Group ang pugante nga maasami nagapatigayon sang robbery sa bahin sang 3rd District.
Ginabanta may walo tubtob napulo ka miyembro Seva Group kun sa diin si Montoya lang ang nadakop sa syudad sang Silay.
Ini ang may kaso naman nga carnapping, robbery, bayolasyon sa Republic Act 10591 ukon illegal possession of firearms and ammunition, attempted homecide kag acts of lasciviousness.
Panugyan sang hepe nga kun may makakita nga pumuluyo sa syudad sang Victorias sa pugante, gilayon man nga ipahibalo sa ila agud nga madakpan.
Pinaagi sini mapanas naman ang kahadlok sang kadamuan nga mga pumuluyo.
Samtang pasalig naman sini nga kun luyag magsungka sang pugante, nakahanda man sila sa Victorias City Police Station nag magbaton.
Nagpasalig man ini sa pamilya nga kun magsungka, wala sang malain nga matabo kay Montoya kag igabalik lang nila sa iya pagkapriso bangod may salabtun pa ini nga dapat bayaran.
