Nagpanindugan si Victorias mayoral candidate Javi Benitez nga wala sang kamatuoran ang alegasyon sang bata ni Councilor Virgie Adorio nga siya ang ginpaluhod kag ginpabisa sang Marso 28 kasunod sang ila nga meeting.
Sa statement nga ginpagwa ni Javi Benitez, gin-athag sini nga nagrequest si Jun Adorio sang meeting kun sa diin luyag sini nga maghingyo sang pasaylo bangud nagaduda na ang mga tawo sa iya nga loyalty sa partido kag sa team.
Suno kay Javi, first time niya nga nameet si Jun Adorio sang amo nga tion gani wala sang rason nga himuon niya ang pagpaluhod kag pagpabisa.
Suno sa mayoral candidate, wala sang basehan, sala, malisyoso kag imahinasyon lamang ni Jun ang tanan agud nga mamantsahan ang maayo niya nga reputasyon.
Panindugan sang bata nga Benitez, pulitika ang rason sa likod sang mga pahayag ni Jun Adorio.
Suno kay Javi, may iban nga mga tawo sa nasambit nga pagsinapol nga makatestify kun ano gid ang matuod nga natabo.
Sa karon suno sa kandidato, ang kaangay sini nga mga butang ang pagadal-on sa proper forum.
