Bilang pagsabat sa panawagan ni President Bongbong Marcos nga panubuan ang presyo sang refined sugar, nag-upod naman ang Victorias Milling Company sa dalagko nga supermarkets sa pagbaligya sang refined sugar sa bili nga P70 kada kilo.
Suno kay Atty. Eva Rodriguez, compliance and information officer sang Victorias Milling Company, nagpagwa sila sang announcement kahapon nga magabaligya ang VMC sang refined sugar sa P70 kada kilo.
Suno diri, ang kalamay nga ginabaligya sang VMC ang para lamang sa household gani may yara sila sang sistema nga ginagamit agud masiguro nga isa lang ka kilo sang kalamay ang mabakal sang isa ka panimalay kada semana kag indi magbalik-balik ang isa lang ka konsumidor.
Ang P70 per kilo nga refined sugar ang sarang mabakal sa outlet sang VMC sa Dalan Lacson, kag duha ka outlet sang Triumph Home Depot.
May kiosko man ang VMC sa ciudad mismo sang Victorias.
May ginaistorya man nga iban nga outlets agud nga makabaligya sang P70 nga refined sugar apang wala pa ini nafinalize.
Suno kay Rodriguez, 250,000 kilos ang initial nga kadamuon sang refined sugar ang narepack na sang VMC kag ini ang natalana nga dugangan agud mas madamo ang makabakal.
