Sa ikatalo nga adlaw sang impeachment trial ni Vice President Sara Duterte, ginpagwa ang isa ka video clip sang emosyonal nga press conference ni Atty. Zuleika Lopez sang Nobyembre 23, 2024.
Ginamit ini ni Defense Counsel Atty. Carlo Joaquin Narvasa sa iya nga cross-examination kay National Bureau of Investigation (NBI) Senior Agent John Mark Calilung agud nga usisaon ang context kag kredibilidad sang ginpatigayon nga open-source investigation ni Calilung sa tunga sagihapon sang pagdiskusyon sa Article 4 ng Articles of Impeachment.
Sa ginpakita nga video clips samtang nagapamangkot si Atty. Narvasa kay Agent Calilung, makita ang emosyonal nga si Usec. Zuleika Lopez, Chief of Staff sang Office of the Vice President nga nagahilibion matapos nga siya ang gindagdagan sang contempt sang Kamara.
Ginpahayag sini ang tuman nga kabalaka para sa iya nga kabuhi bangud sa pamahog sang pagsaylo sa iya sa Correctional Institution for Women sa Mandaluyong City sadto.
Ginsita sang depensa ang mga nakasulat sa transcript nga ginpatigayon ni Calilung.
Ginpunto man ni Narvasa nga may mga “loophole” ukon kulang nga tinaga kaangay sang “detainee” kag “accused” nga ginbuy-an ni Lopez apang wala nakabutang sa opisyal nga dokyumento sang NBI.
Gin-emphasize man sang depensa nga ang nangin pahayag ni VP Sara Duterte angot sa gina-alegar nga kill order ang tuga lamang sang emosyon kag kabalaka nga ginbatyag sang iya nga Chief of Staff, kag indi ini isa ka criminal threat.
Nag-oppose naman si Private Prosecutor Amando Ligutan.
Suno sa prosecution, irrelevant ang pamangkot sang depensa kag ginpahayag nga gamay lamang nga bagay ukon “miniscule differences” lamang ang mga tinaga nga ginatumod sang depensa kag indi man sini mabag-o ang kamatuoran nga nalantaw kag gina-imbestigaran mismo ni Calilung ang mismo nga video.
