Nagaantos ang mga nagaistar sa subdivision nga ginapanag-iyahan sang Pamilya Villar sa Bacolod bangud duha na ka adlaw nga wala sang water supply.
Ang Camella Bacolod South, Camella Mandalagan kag Lumina Homes ang may kaugalingon nga water system paagi sa First Peak Resources and Technologies, Inc. Indi ini konektado sa Bacolod City Water District.
Kahapon pa lang sang aga, isa ka adlaw matapos naglabay ang Bagyo Tino, wala na sang water supply sa Camella Bacolod South.
Guba ang generator set nga gamiton kuntani sa pagpasaka sang tubig.
Wala gid sang remedyo nga nahimo ang developer agud nga masuplayan ang mga homeowners bisan si Villar man ang nagapanag-iya sang Prime Water.
Wala pa sang kasiguraduhan kun san-o marestore ang power supply sa subdivision gani wala man sang kasiguraduhan kun san-o mabalik ang water supply sa Camella.
Ang sigurado diri amo ang padayon nga paghangla sang mga homeowners bangud wala man sang makasabat sang ila mga pamangkot.
