Diutay lamang ang mga salakyan nga nadakpan nga nagabayolar sa No Parking Zone sa Lacson Street, Bacolod City kag natow sa una nga adlaw sang implementasyon sang claming and towing ordinance sang Bacolod City Government.
Sa interview sang Bombo Radyo Bacolod kay Bacolod Traffic Authority Office (BTAO) Head Police Major Junji Liba, ginalauman na sini ang negatibo nga reaksyon kadungan sang implementasyon, apang ginapakamaayo sini nga maayo man ang kalabanan nga reaksyon sang publiko.
Indi kaangay sadto nga kun hungdon nagadangat sa 50 ang makita nga nagabayolar sa No Parking Zone sa bilog nga adlaw, ala-1:00 kaina sang hapon, siyam pa lamang ang mga salakyan nga gintow sa dalan Lacson.
Paathag sini nga nagalibot sa bilog nga Lacson Street ang enforcement team, gani ginalantaw sini nga ang pagnubo sang apprehension ang bangod nakahibalo na ang mga motorista sa ginapatuman nga ordinansa.
Apang ginakasubo sang BTAO Head nga sa siyam nga mga nadakpan, masami nga rasun sang mga ini amo nga sila ang wala sang ihibalo nga may ginapatuman nga clamping and towing ordinance.
Sang ginpamangkot ang ila nga address, ginkatingala ni Liba kun paano nga wala ang mga ini sang ihibalo nga diri man lang nagapuyo sa ciudad.
Madumduman nga pila na ka semana nga masami naga-atubang sa Bombo Radyo Bacolod si Liba agud ipalab-ot ang implementasyon sang clamping kag towing nga gin-umpisahan sa dalan Lacson sumugod subong nga adlaw.
Ang siyam ka mga salakyan ang gindala sa impounding area, kun sa diin yara man ang cashier nga nakahanda sa pagbatun sang bayad.
Dugang pa sini nga indi na bag-o ang pagpatuman sang BTAO sang paghawan sa dalan partikular na sa atubang sang Corazon Locsin Montelibano Memorial Regional Hospital.
Suno kay Liba ang salakyan nga maclamp ang magabayad sang multa nga P600, para sa light vehicles samtang P1,500 naman ang towing para sa mga light vehicles kaangay sang sedan.
Ang mga tricycle ukon motorsiklo nga itow ang magabayad naman sang balor P1,000.
Samtang may adisyunal naman nga tag-P200 kada maglapaw sa four kilometers sa pagtow padulong sa impounding area.
Paathag sini nga wala ginapahanugutan ang ayu-anay agud mapanguyatan man ang kredibilidad sa hinambalan.
Pahanumdom naman sini sa mga puderoso nga mahimo maggamit sang pangalan agud makasalbar sa towing, nga sila ang dapat mangin modelo sa pagtuman sang traffic rules.
