Nakahanda na ang Department of Education (DepEd) sa paglunsyar sang Brigada Eskwela subong adlaw.
Sa interview sang Bombo Radyo Bacolod kay Ian Arnold Arnaez, public information officer sang DepEd Division of Negros Occidental, ginpahayag sini nga wala sang pahanugutan nga mga estudyante nga makabalik sa eskwelahan.
Ipaagi sa virtual kag online ang mga aktibidad nga patigayunon sang ahensya subong nga adlaw.
Magluwas sa virtual Brigada Eskwela, magapatigayon man ang mga ini sang remote enrollment ukon validation sang mga enrollees.
Suno kay Arnaez, kontakon lamang sang nakaligad nga adviser ang estudyante paagi sa text ukon mahimo man nga tawgan ini agud malab-ot kag masiguro nga maeskwela ini subong nga tuig.
Ginpasiguro man nga wala sang matabo nga face to face enrollment.
Ginpahayag man sini nga sa ikatatlo nga semana sang Hunyo, mahimo nga makig-angot ang mga estudyante sa mga Barangay Kapitan sang tagsa ka mga Barangay agud magkuha kag fill-out sang enrollment form kag ibilin na lamang ini agud kuhaon lamang sang incharge sa barangay.
Dugang man sini sa pagpatigayon sang Brigada Eskwela sa karun ang wala nagakinahanglan nga magakadto sa eskwelahan agud maninlo kag mangrepair sa eskwelahan bangud may yara na sang ginline-up ang national office sa mga hilikuton.
Ini ang ginalakipan sang pagpadayon sang pagubra sang continuity plan sang mga eskwelahan kag pag-orient sa mga ginakanan kag manunudlo paagi sa online.
Pila sa nalakip sa mahimo ubrahon sang kabataan sa tion sang virtual brigada amo ang backyard gardening kun sa diin mapuslan sang mga ini.
Gina-athag man sini nga indi ini mandatory apang gina-engganyo lamang ang mga estudyante kag ginikanan agud indi na mabudlayan sa pagwa sa pagbakal.
May nahanda naman nga audio visual ang DepEd sa paglunsyar sang virtual Brigada kun sa diin magahambal si Deped Region 6 Director Ma. Gemma Ledesma.
