Ginpasalamatan sang Regional Director sang Department of Education (DepEd) Region 6 ang tanan nga nagbug-os sang team agud mapatigayon ang madinalag-on nga paghost sang DepEd Region 6 sa paglunsyar sang Virtual Brigada Eskwela subong nga tuig.
Sa interview sang Bombo Radyo Bacolod kay Regional Director Gemma Ledesma, ginpahayag sini nga dako ang nangin kabahin sang teknolohiya sa kadalag-an sa paglunsyar sang Brigada Eskwela.
Ginpasalamatan man sini ang Information Technology Officers, Division heads kag iban pa nga nakigbahin kag nagbulig agud matigayon ang programa.
Aminado man ini nga dako nga pagpanghangkat sa DepEd bangud naka-andan na nga ginapatigayon ang Brigada Eskwela nga face to face.
Ginpahayag man sini nga ginatinguhaan sang DepEd nga matigayon ang enrollment nga indi face to face kaangay lamang sang remote enrollment nga ginapatigayon sa karun.
Ini ang pagkontak sang maestra sang bata sang tinalikdan nga tuig.
Mahimo nga sa text messenger, text message ukon facebook.
Suno kay Ledesma, nagpanugyan man ini sa mga manunudlo nga sa tion nga makontak ang estudyante, ini na ang magfill-out learner’s survey form agud wala na sang face to face nga enrollment.
Paagi man sa remote enrollment mahibaluan sang DepEd kag maclassify ang available nga magamit agud nga makatuon ang mga estudyante kaangay sang radio, tv ukon online.
Ginkompirmar man sini nga sa ikatatlo nga semana sang Hunyo mahimo na nga makapalapit sa eskwelahan ang mga estudyante.
Ang mga tikang nga ginahimo sang ahensya ang sa panawagan ni Presidente Rodrigo Duterte nga amligan ang health kag safety sang kabataan.
