BACOLOD CITY – Temporaryo nga ginsuspendir ang visitation privilege sa mga persons deprived of liberty (PDL) sa Bureau of Jail Management and Penology (BJMP) Region 6 bangud sa pagsaka sang kaso sang coronavirus disease 2019 nga kabahin man sang ginpapanaog nga memorandum sang Bureau of Corrections.
Sa interview sang Bombo Radyo kay Jail Supt. Gilbert Peremne, Deputy Director for Administration sang BJMP Region 6, iya ginpahayag nga temporaryo nga ginadumilian ang pagbaton sang bisita sang mga preso magluwas lang kun kinahanglanon kag importante bilang kabahin man sang ila preventive measures batok sa nasambit nga virus.
Suno kay Peremne, magluwas sa ginpapanaog nga memorandum sang BUCOR may yara naman sang ginapatigayon nga lihok ang BJMP Region 6 agud malikaw ang mga preso lakip man ang ila mga himata nga malatnan sang COVID-19.
Dugang sini, ginpa-iway naman nila ang pagpatigayon sang mga aktibidad kag iban pa nga pagtilipon sa sulod sang BJMP.
Santo sa pahayag ni Peremne, indi pa nila mapat-od kun tubtob san-o ang pagpatuman sang temporaryo nga suspension sa pagbisita bangud nakadepende man ini sa pinal nga abiso sang national headquarters kag Department of Health may kaangtanan sa sitwasyon sang COVID-19 sa pungsod.
